თბილისი, 26 აპრილი - Sputnik. ქალაქ თბილისში მცხოვრები მოქალაქეები, 29 აპრილიდან, სასოფლო-სამეურნეო საქმიანობის მიზნით, ქალაქიდან გასვლას გარემოს დაცვისა და სოფლის მეურნეობის სამინისტროს მიერ გაცემული საშვით შეძლებენ, ნათქვამია უწყების მიერ გავრცელებულ განცხადებაში.
მოქალაქეები ქალაქიდან გასვლას დილის 06:00-08:00 სთ-მდე, ხოლო დაბრუნებას საღამოს 18:00-19:00 სთ-მდე შეძლებენ.
ნებართვის მისაღები ფორმა განთავსდება გარემოს დაცვისა და სოფლის მეურნეობის სამინისტროს ვებგვერდზე. მსურველებმა აღნიშნული ფორმა/განაცხადი უნდა შეავსოს ქალაქიდან გასვლამდე 12 საათით ადრე.
შემოსული განაცხადის საფუძველზე სამინისტრო გასცემს საშვს ელექტრონული და/ან მატერიალური ფორმით (საჭიროების მიხედვით, ერთჯერადს ან მრავალჯერადს).
უარყოფითი პასუხის შემთხვევაში, განმცხადებელი პასუხს მიიღებს ელექტრონულად.
რაც შეეხება დიდ ქალაქებს, სასოფლო-სამეურნეო საქმიანობის მიზნით, ბათუმიდან, რუსთავიდან და ქუთაისიდან გასვლა-შესვლის საშვის მისაღებად, მოქალაქეებმა უნდა მიმართონ რეგიონულ შტაბებს.
საქართველოში შეზღუდვები ეტაპობრივად, ყოველ ორ კვირაში მოიხსნება ვირუსის გავრცელების დონისა და ექიმების რეკომენდაციების მიხედვით, განაცხადა საქართველოს პრემიერ-მინისტრმა გიორგი გახარიამ ანტიკრიზისული გეგმის წარდგენისას.
ახალი ტიპის კორონავირუსის გავრცელების საფრთხის გამო საგანგებო მდგომარეობა საქართველოში 21 მარტს ამოქმედდა. 10 დღის შემდეგ დაწესდა კომენდანტის საათი, ხოლო 17 აპრილს აიკრძალა მსუბუქი ავტომობილების მოძრაობა სპეციალური ნებართვის გარეშე.
პირველი ეტაპი 27 აპრილიდან დაიწყება. ამ დღიდან შესაძლებელი იქნება მსუბუქი ავტომობილებისა და ტაქსების მოძრაობა.
ორშაბათიდან ასევე დაშვებული იქნება ონლაინ–ვაჭრობა - ნებისმიერი პროდუქტის მიწოდება და ღია აგრარული ბაზრების მუშაობა.
