თბილისი, 22 აპრილი – Sputnik. საქართველოს პრემიერ–მინისტრ გიორგი გახარიას მრჩეველმა, მთავრობის პრეს–სპიკერმა ირაკლი ჩიქოვანმა დააზუსტა იმ უწყებებისა და ავტომობილების რაოდენობა, რომელთა მიმართაც გადაადგილებაზე შეზღუდვები არ ვრცელდება.
საქართველოში 17 აპრილიდან 27 აპრილამდე მსუბუქი ავტომობილებით გადაადგილება იკრალება. თუმცა, მოქალაქეების დიდი ნაწილი უკმაყოფილებას გამოთქვამს იმასთან დაკავშირებით, რომ მიუხედავად აკრძალვისა, ქალაქში მაინც ბევრი ავტომობილი მოძრაობს.
სოციალურ ქსელებში გაჩნდა ვარაუდი იმასთან დაკავშირებით, რომ სპეციალური ნებართვის მიღება ზედა ეშელონებთან დაახლოებულმა პირებმა „იჩალიჩეს“ მაშინ, როდესაც საქართველოში დაწესებული შეზღუდვების გამო მაღაზიებმა მუშაობა შეაჩერეს.
„ავტომობილების გადაადგილება შინაგან საქმეთა სამინისტროს მხრიდან მკაცრად კონტროლდება. შსს–ს წარმომადგენლები ყოველდღიურად, 24–საათიან რეჟიმში მუშაობენ, რათა ადამიანებმა ნებართვები ბოროტად არ გამოიყენონ“, – აღნიშნა ჩიქოვანმა.
მისი სიტყვებით ავტომობილებით გადაადგილებაზე ნებართვა მიიღო დაახლოებით 2,9 ათასმა აფთიაქმა, 5 ათასზე მეტმა მაღაზიამ, 1,3 ათასმა საცხობმა და პურის მაღაზიებმა, 1 ათასამდე სამედიცინო დაწესებულებამ, მათ შორის 300–მა საავადმყოფომ.
სპეციალური საშვით სარგებლობენ ასევე მასმედია, ტვირთგადამზიდავი კომპანიები, დასუფთავებისა და დეზინფექციის სამსახურები, პერსონალი, რომელიც ემსახურება ბანკომატებს და სწრაფი გადახდის აპარატებს, კერძო დაცვის სამსახური, დაკრძალვის ბიუროები, ფოსტის თანამშრომლები და კურიერები, ადამიანები, რომლებიც დაკავშირებული არიან ელექტროენერგიის, ბუნებრივი აირისა და წყლის მიწოდებასთან, ასევე სატელეკომუნიკაციო და ნარჩენების მართვის სამსახურები, ლიფტებისა და ტექნიკურად საფრთხის შემცველი ობიექტების მომსახურების სერვისები.
გარდა ამისა, ავტომობილით გადაადგილების უფლებით სარგებლობენ ჩინოვნიკები, რომელთა საქმიანობაც ქვეყნისთვის კრიტიკულად მნიშვნელოვანია.
