თბილისი, 19 აპრილი - Sputnik. საქართველოში, სასაფლაოების შესასვლელებს სამართალდამცველები აკონტროლებენ, იუწყება საზოგადოებრივი მაუწყებლის პირველი არხი.
საგანგებო მდგომარეობის ფარგლებში, 17 აპრილიდან 10 დღის ვადით სასაფლაოებზე შეზღუდვები დაწესდა. საქართველოს მთავრობის განმარტებით, ქვეყნის მასშტაბით იკრძალება სასაფლაოს ტერიტორიაზე შესვლა.
მთავრობის დადგენილებით, აკრძალვა არ ეხება მიცვალებულის დაკრძალვასთან დაკავშირებული ღონისძიებების განხორციელების მიზნით სასაფლაოს ტერიტორიაზე შესვლასა და გადაადგილებას.
სამართალდამცველები თბილისის სასაფლაოების შესასვლელებს აკონტროლებენ.
ქობულეთის მუნიციპალიტეტის იმ სოფლებში, სადაც მკაცრი საკარანტინე პირობები მოქმედებს, დილიდან სასაფლაოების შესასვლელებს სამართალდამცველები აკონტროლებენ.
იმერეთში სასაფლაოების შესასვლელებს შინაგან საქმეთა სამინისტროს წარმომადგენლები აკონტროლებენ.
ამასთან, იმერეთში სახელმწიფო რწმუნებული ზვიად შალამბერიძე დილიდან სხვადასხვა მუნიციპალიტეტის სასაფლაოებზე მონიტორინგს პირადად ახორციელებს.
როგორც ზვიად შალამბერიძემ აღნიშნა, სააღდგომო ლიტურგიამ მშვიდ ვითარებაში ჩაიარა და მოსახლეობა შეზღუდვებს გაგებით ეკიდება.
ასევე, პოლიცია მობილიზებულია კახეთის რეგიონის სასაფლაოებთან და ამ დრომდე არანაირი დარღვევა არ დაფიქსირებულა.
კახეთის გუბერნატორის, ირაკლი ქადაგიშვილის განმარტებით, საპოლიციო კონტროლი რეგიონის ყველა ქალაქისა და მუნიციპალიტეტის მასშტაბით ხვალაც გაგრძელდება.
