ქართველ მამაკაცებს შორის ერთ-ერთი ყველაზე გამორჩეული ირაკლი მაქაცარიაა. მის მიმართ ყურადღება არ ნელდება. სახლში დარჩენილი ტელესახე რადიკალურად შეიცვალა და ახლა უფრო დიდ ინტერესს იწვევს. უახლეს ფოტოებზე ირაკლი მაქაცარიას ამოცნობა გაგიჭირდებათ, ისევე, როგორც მის დანარჩენ თაყვანისმცემლებს. ისინი ირაკლის გარეგნობის ცვლილებებს აქტიურად განიხილავენ. ირაკლი მაქაცარიამ წვერი გაიზარდა და ახლა სამზარეულოში აჭარულების გამოცხობით არის დაკავებული. მისი საქმიანობა უამრავმა ქალმა მოიწონა. ვიდეო-გაკვეთილის კომენტარებში განსაკუთრებულად უკრაინელი მანდილოსნები გააქტიურდნენ, რომლებმაც ირაკლის აჭარული ხაჭაპურის რეცეპტიც ჩაიწერეს.
უკრაინასთან მაქაცარიას, მრავალ მეგობართან და კინოინდუსტრიაში საქმიან ურთიერთობებთან ერთად, რომანტიკულ შოუ Холостяк 6-ში მონაწილეობაც აკავშირებს. გარდა ამისა, ბიზნესმენს 2017 წელს ქართულ „ცეკვავენ ვარსკვლავებში" მონაწილეობის გამოცდილება აქვს, სადაც ფინალამდე მიაღწია.
33 წლის ბათუმელი ახალგაზრდა ნამდვილად სასურველი და „დიპლომიანი“ სასიძოა. ქართველი გოგონების გარდა, მთელი უკრაინა საკუთარი შარმით, ქარიზმატულობით და ცეკვის ნიჭით მოხიბლა. აღსანიშნავია, რომ საშუალო სკოლა აშშ-ში დაამთავრა, უმაღლესი განათლება თბილისის კავკასიის ბიზნეს-სკოლაში მიიღო. ირაკლი მაქაცარია ძირითადი სპეციალობით მარკეტოლოგია. 2013 წელს დააფუძნა კომპანია Maq Entertainment, რომელიც "ბოლივუდთან" თანამშრომლობს. სახელი რეიტინგული თოქ-შოუ „პრაიმ შოუს“ წამყვანობით გაითქვა.
