თბილისი, 13 აპრილი — Sputnik. კიევ-პეჩორის ლავრა კარანტინზე იკეტება იქ გამოვლენილი კორონავირუსით ინფიცირების 90-ზე მეტი შემთხვევის გამო, განაცხადა კიევის მერმა ვიტალი კლიჩკომ ონლაინ-პრესკონფერენციისას.
„კიევ-პეჩორის ლავრა, დედაქალაქის საგანგებო ვითარებათა კომისიის გადაწყვეტილებით, კარანტინზე იკეტება! მივმართავ სამართალდამცველ ორგანოებს, გააკონტროლონ ამ გადაწყვეტილების შესრულება“, — განაცხადა კლიჩკომ.
მისი თქმით, მარტო გასული დღე-ღამის განმავლობაში კიევში ინფიცირების დადასტურებული 79 შემთხვევიდან 63 კიევ-პეჩორის ლავრაზე მოდის. სულ ლავრაში კორონავირუსით დასნებოვნების 90-ზე მეტი ფაქტია დადასტურებული.
„ქალაქი დღეს ლავრაში მობილურ რენტგენებსა და მედიკოსების ბრიგადას გაგზავნის ტესტის სინჯების ასაღებად. ჩვენ რეალური სურათი უნდა გვქონდეს დაავადების კერაზე“, — აღნიშნა კლიჩკომ.
მანამდე გავრცელდა ინფორმაცია, რომ კორონავირუსით ინფიცირებული მეუფე პავლე ექიმებმა საავადმყოფოში გადაიყვანეს.
უკრაინაში გასული 24 საათის განმავლობაში კორონავირუსით ინფიცირებულთა რაოდენობა 325-ით გაიზარდა და ამ დროისათვის 3 102 დაავადებულს შეადგენს ქვეყნის მასშტაბით. აქედან გარდაცვლილია 93 და განკურნებულია 97 პაციენტი.
