თბილისი, 9 აპრილი – Sputnik. კორონავირუსის წინააღმდეგ ბრძოლაში 22 მარტიდან ჩართულმა საქართველოს თავდაცვის ძალებმა სპეციალური ხსნარებით 211 726 ავტომობილს ჩაუტარეს დეზინფექცია და 459 979 მოქალაქეს ტემპერატურა გაუზომეს, იუწყება საზოგადოებრივი მაუწყებლის პირველი არხი თავდაცვის სამინისტროზე დაყრდნობით.
უწყების ცნობით, საქართველოს თავდაცვის ძალების დასავლეთის სარდალი, პოლკოვნიკი ჯონი ტატუნაშვილი იმერეთის სამხარეო კრიმინალური პოლიციის დეპარტამენტის უფროსთან, ვიცე-პოლკოვნიკ სულხან თამაზაშვილთან ერთად ქუთაისში მოწყობილ გადაადგილების კონტროლის პუნქტების მუშაობას გაეცნო.
ისინი ადგილზე დააკვირდნენ სამხედროებისა და სამართალდამცველების კოორდინირებულ მუშაობას, თუ როგორ ხორციელდება ერთობლივი ძალებით ავტოტრანსპორტის მოძრაობის კონტროლი, ტრანსპორტის დეზინფექცია სპეციალური ხსნარებით და მოქალაქეების პირველადი ჯანმრთელობის შემოწმება. შემდეგ კი საველე სამედიცინო პუნქტები მოინახულეს და სამხედრო ექიმების მუშაობის სპეციფიკას ადგილზე გაეცნენ.
მაღალი რანგის ოფიცრებმა სამხედროებსა და პოლიციელებს ეპიდემიის გავრცელების წინააღმდეგ მიმართულ პრევენციულ ღონისძებებში აქტიური მონაწილეობისთვის მადლობა გადაუხადეს.
„საგუშაგოებზე 24-საათიან რეჟიმში III ქვეითი ბრიგადის პირადი შემადგენლობა სამართალდამცველებთან ერთადაა მობილიზებული და კორონავირუსის გავრცელების პრევენციული ღონისძიებების ფარგლებში დაკისრებულ ამოცანებს ასრულებს“, – ნათქვამია უწყების განცხადებაში.
9 აპრილის მონაცემებით, საქართველოში კორონავირუსით ინფიცირებულთა რაოდენობამ 214-ს მიაღწია. გამოჯანმრთელდა 50, გარდაიცვალა 3. კარანტინში იმყოფება 4 722 ადამიანი, ექიმების მეთვალყურეობის ქვეშ 408 პაციენტია.
