თბილისი, 6 აპრილი – Sputnik. სახელმწიფო კორონავირუსით ინფიცირებული პაციენტების მკურნალობის ხარჯებს ამ ეტაპზე მთლიანად ფარავს, თუმცა ფინანსური მხარდაჭერის თაობაზე კერძო კომპანიებთან მოლაპარაკებები მიმდინარეობს, განაცხადა ბრიფინგზე ჯანდაცვის მინისტრმა ეკატერინე ტიკარაძემ.
ტიკარაძის თქმით, შესაძლოა, კერძო სადაზღვევო კომპანიები ჩაერთონ ასევე ონლაინ–მომსახურების გაძლიერებაში.
„დღევანდელ ეტაპზე კოვიდინფექციაზე მკურნალობის ხარჯებს სრულად ფარავს სახელმწიფო, თუმცა არსებობს მოსაზრება, რომ კერძო სადაზღვევო კომპანიები ჩაერთონ როგორც ონლაინ–მომსახურებაში, თავად ონლაინ–ხაზის გასაძლიერებლად, ასევე ფინანსურ მხარდაჭერაში. ამასთან დაკავშირებით ჩვენ მოლაპარაკებებს გავმართავთ და ეს საკითხი მას შემდეგ გახდება ცნობილი, რაც ერთობლივ გადაწყვეტილებას მივიღებთ სადაზღვევო კომპანიებთან ერთად“, – განაცხადა ტიკარაძემ.
ქვეყანაში ამ დროისთვის კორონავირუსით ინფიცირებულია 188 ადამიანი, აქედან განიკურნა 36, გარდაიცვალა – 2, კარანტინშია 5056 ადამიანი, ხოლო სტაციონარებში მეთვალყურეობის ქვეშ 386 პაციენტია.