თბილისი, 26 მარტი — Sputnik. უკაცრიელი ქუჩები, დაკეტილი მაღაზიები, სასტიკი რიცხვები ყოველდღე — ეს მხოლოდ რეალობის მცირე ნაწილია, ამბობს ნიუ-იორკელი ექიმი სტივ კასპიდისი.
მისი თქმით, „ეს „ბიბლიური ჯოჯოხეთია“.
„სტივ კასპიდისმა იცის, რასაც ამბობს. ის მოვლენების ეპიცენტრშია — ქვინსის მაუნთ-სინაის საავადმყოფოში, ამ დროისათვის მსოფლიოს ყველაზე ინფიცირებული ქალაქის – ნიუ-იორკის ყველაზე ინფიცირებულ რაიონში“, — წერს SKY News-ი.
დოქტორ კასპიდისის თქმით, ადამიანები უწყვეტად აკითხავენ საავადმყოფოს, მათ სუნთქვა უჭირთ, ისინი უჰაერობით კვდებიან და სისტემა ამას ვერ უმკლავდება.
„ჩემი ქალიშვილი ინტერნია ბრუკლინში. დღეს ის ინტენსიური თერაპიის განყოფილებაში იწყებს მუშობას და მე წუხელ მთელი ღამე თვალი ვერ მოვხუჭე. ეს შემაწრძუნებელია“, — ამბობს ექიმი.
მისი თქმით, ნიუ-იორკისთვის კატასტროფა უჩვეულო არ არის, მაგრამ ახლა „გრძნობ, რომ შეუცნობლის ზღვარზე დგახარ“.
აღსანიშნავია, რომ, ჯონს ჰოპკინსის უნივერსიტეტის სპეციალური პროექტის მონაცემებით, აშშ ერთ-ერთია იმ რამდენიმე ქვეყანას შორის, სადაც COVID-19-ით ინფიცირებულთა შორის მსხვერპლი უფრო მეტია, ვიდრე განკურნებული.
ამ დროისათვის აშშ-ში ახალი კორონავირუსით ინფიცირებულია 69 197 ადამიანი, აქედან გარდაცვლილია 1046, ხოლო გამოჯანმრთელებულია 619 კაცი.
სხვა ქვეყნები, სადაც მსგავსი ვითარება შეინიშნება, არიან: შვეიცარია (165 გარდაცვლილი – 131 განკურნებული), დიდი ბრიტანეთი (467 — 141), ნიდერლანდები (357 — 6), ნორვეგია (14 — 6), პორტუგალია (43 — 22), ბრაზილია (60 — 6), შვედეთი (54 — 16), თურქეთი (59 — 26), ეკვადორი (29 — 6) და სხვ.
