თბილისი, 23 თებერვალი - Sputnik. თურქეთში მიწისძვრის შედეგად დაღუპულებსა და დაშავებულებს შორის საქართველოს მოქალაქეები არ არიან, იუწყება საქართველოს საგარეო საქმეთა სამინისტრო.
5,7 მაგნიტუდის სიმძლავრის მიწისძვრა ირანისა და თურქეთის საზღვარზე გამთენიისას მოხდა. ეპიცენტრი მდებარეობდა 141 კილომეტრში დასავლეთით, ირანის ქალაქ თავრიზიდან და თურქეთის ქალაქ ოზალპიდან სამხრეთ-აღმოსავლეთით 71 კილომეტრში. კერა 5 კილომეტრის სიღრმეზე მდებარეობდა. დღეს დილით დაფიქსირდა კიდევ 10 აფტერშოკი, უძლიერესი 4,4 მაგნიტუდის სიმძლავრის იყო.
საქართველოს საგარეო საქმეთა სამინისტროს ინფორმაციით, გენერალური საკონსულო აქტიურად თანამშრომლობს თურქეთის ხელისუფლებასთან შესაძლო დაშავებულების შესახებ ინფორმაციის მიღების მიზნით.
ოფიციალური ინფორმაციით, თურქეთში მიწისძვრის შედეგად დაიღუპა 9 ადამიანი, მათ შორის არის სამი ბავშვი, დაშავდა 37 ადამიანი. ირანში დაშავებულთა რაოდენობამ 75-ს მიაღწია.
