თბილისი, 15 თებერვალი - Sputnik. ბერლინში კომედიური შოუ ტრაგედიად იქცა - ერთი ადამიანი დაიღუპა, ოთხი კი დაიჭრა სროლის შედეგად, რომელიც პარასკევს საღამოს უცნობმა პირებმა ატეხეს, იუწყება РИА Новости პორტალ Local-ზე დაყრდნობით.
პორტალის მონაცემებით, რომელიც პოლიციის სამსახურს ეყრდნობა, სროლა მოხდა ბერლინში კროიცბერგის რაიონში საკონცერტო-სპორტული დარბაზ Tempodrom-ის შესასვლელთან, სადაც იმ დროს თურქული კომედიური შოუ Güldür Güldür Show გადიოდა. მაყურებლები უკანა და გვერდით შესასვლელებიდან გაიყვანეს.
დაიღუპა 42 წლის მამაკაცი. ზოგიერთი დაჭრილი მძიმე მდგომარეობაშია.
პოლიცია ვარაუდობს, რომ რამდენიმე მსროლელი იყო. სავარაუდო ბოროტმოქმედებმა დანაშაულის ადგილი დატოვეს. ადგილზე მობილიზებულია 200 პოლიციელი, დაწყებულია გამოძიება.
