თბილისი, 29 იანვარი — Sputnik. რუსთავში, სავარაუდოდ, ბუნებრივი აირის ნამწვით ახალგაზრდა ცოლ-ქმარი დაიღუპა, იუწყება საზოგადოებრივი მაუწყებლის პირველი არხი.
დაღუპული მშობლები სახლში შვილმა ნახა, რომელსაც ღამით გვერდით ოთახში ეძინა. გოგონას მდგომარეობა ამ დროისთვის სტაბილურია. მას ნერვული შოკი აქვს.
ოჯახი აღნიშნულ ბინაში ქირით ცხოვრობდა. ადგილზე მობილიზებული იყვნენ სასწრაფო დახმარებისა და პოლიციის ეკიპაჟები.
დიდი ქალაქების საცხოვრებელ ბინებში წლებია ცენტრალური გათბობა არ არის, მოსახლეობა სხვადასხვა ელექტრო და გაზის დანადგარებით თბება. უმეტეს შემთხვევაში ეს დანადგარები უხარისხო და კუსტარულად დამონტაჟებულია.
„თბილისი ენერჯი" და სხვა გაზგამანაწილებელი კომპანიები მოსახლეობას აფრთხილებენ, რომ კუსტარულად დამზადებული გაზის დანადგარები, განსაკუთრებით, ღია წვის კამერიანი, სიცოცხლისთვის საშიშია.
