ცნობილ მომღერალ სოსო პავლიაშვილს რუსეთში და საქართველოში კარგად იცნობენ. ექვსი წლის ასაკში პავლიაშვილმა ვიოლინოზე დაკვრა ისწავლა. მოგვიანებით გამოდიოდა ნიჭიერი ახალგაზრდების კონკურსებსა და კონცერტებზე. იყო ლეგენდარული ანსამბლ „ივერიას“ მონაწილე. გამარჯვებამ იურმალას ფესტივალზე (1989) მას საყოველთაო პოპულარობა მოუტანა. პავლიაშვილს ყოველთვის გამოარჩევდა გამოსვლის ემოციური მანერა, რომელსაც შესანიშნავ ვოკალურ მონაცემებთან ერთად მაყურებელი აღფრთოვანებაში მოჰყავს.
წლების წინ საქართველოში ძალიან პოპულარულმა მომღერალმა, სხვა ბევრი ქართველის მსგავსად, კარიერის გასაკეთებლად რუსეთს მიაშურა. მაშინ მომღერალი საქართველოში ნინო უჩანეიშვილზე იყო დაქორწინებული. წყვილს ჰყავს საერთო ვაჟი ლევანი.
რუსეთში სოსო პავლიაშვილმა 16 წლით უმცროს მოცეკვავესთან ირინა პატლახთან ერთად ცხოვრება გადაწყვიტა, რომელთანაც ორი გოგონა ჰყავს. წყვილის ურთიერთობა უკვე 22 წელს ითვლის, ოფიციალურად კი მათ მხოლოდ რამდენიმე წლის წინ იქორწინეს. პავლიაშვილები მოსკოვის გარეუბანში გრანდიოზულ ვილაში ცხოვრობენ. მათთან ერთად ცხოვრობს სოსოს უფროსი შვილი, 32 წლის ლევან პავლიაშვილი.
ლევანი რუსულ ბომონდში კარგად ცნობილი სახეა. ის წლების წინ მამამ საქართველოდან წაიყვანა და ბიჭმა მოსკოვში სამხედრო სასწავლებელში მიიღო განათლება, თუმცა პროფესიით არასოდეს უმუშავია.
გარდა გარეგნული მსგავსებისა, მამას ის ნიჭითაც დაემსგავსა. ლევან პავლიაშვილი კარგად მღერის. გარდა ამისა, მომღერალმა უფროსი ვაჟი საკუთარ ბიზნესში ჩართო და ის მოსკოვში ერთ-ერთ ყველაზე პოპულარულ კარაოკე-ბარს Небо на ладони ხელმძღვანელობს. ეს ბარი სოსო პავლიაშვილის საკუთრებაა. უმცროსი პავლიაშვილი დიდ დროს ატარებს ბარში და თავადაც მღერის.
