თბილისი, 10 იანვარი — Sputnik. საქართველოს პრეზიდენტმა სალომე ზურაბიშვილმა უკრაინის პრეზიდენტს ვლადიმირ ზელენსკის უკრაინული თვითმფრინავის კატასტროფის შედეგად დაღუპულთა გამო სამძიმრის წერილი გაუგზავნა, იუწყება პრეზიდენტის პრესსამსახური.
10 იანვარი 2020, 12:03
ზურაბიშვილმა, ქართველი ხალხის სახელით, თანადგომა გამოუცხადა უკრაინელ კოლეგას და მიუსამძიმრა დაღუპულთა ოჯახებს.
„მინდა, უდიდესი მწუხარება გამოვხატო იმ ტრაგედიის გამო, რომელიც ამ დღეებში დაატყდა თავს თქვენს ქვეყანას. დღეს ყველა ერთად ვგლოვობთ ავიაკატასტროფის შედეგად დაღუპულ ადამიანებს. მე და ქართველი ხალხი მთლიანად ვიზიარებთ ამ ტკივილს. ახლა მთელი გულითა და გონებით ვდგავართ დაღუპულთა ოჯახების გვერდით და თანაგრძნობას ვუცხადებთ მათ აუნაზღაურებელი დანაკლისის გამო. გისურვებთ გამძლეობასა და განსაცდელთან ღირსეულად გამკლავებას“, — ნათქვამია საქართველოს პრეზიდენტის წერილში.
სამძიმრის წერილი საქართველოში უკრაინის ელჩ იგორ დოლგოვს გადაეცა. ასევე გაკეთდა ჩანაწერი საელჩოში გახსნილ სამძიმრის წიგნში.
