თბილისი, 31 დეკემბერი – Sputnik. ოპოზიციური პარტიების წარმომადგენლები და სამოქალაქო აქტივისტები ახალი წლის შეხვედრას საქართველოს პარლამენტის წინ გეგმავენ.
პოლიციამ ღამით რუსთაველის გამზირზე, პარლამენტის შენობის წინ სამოქალაქო აქტივისტების კარვები აიღო, რომლებიც ნოემბრის შუა რიცხვებიდან ქვეყნის საარჩევნო სისტემის შეცვლას მოითხოვენ. ამჟამად ამ ადგილზე საბავშვო ატრაქციონები დგას.
მოძრაობა „შეცვალეს“ აქტივისტის ნიკა ნოზაძის განცხადებით, სამოქალაქო აქტივისტები ახალ წელს პარლამენტის წინ შეხვდებიან, მაგრამ დეტალების შესახებ ისინი დღის განმავლობაში ისაუბრებენ.
„ნამდვილად ვაპირებ, რომ აქ შევხვდე ახალ წელს“, – განაცხადა „ერთიანი ნაციონალური მოძრაობის“ წევრმა ხატია დეკანოიძემ.
მისი თქმით, ეს „ქართული ოცნების“ ხელისუფლებაში ყოფნის ბოლო წელია.
პარლამენტის წინ კარვების აღების დროს პოლიციასა და სამოქალაქო აქტივისტებს შორის რამდენიმე დაპირისპირება მოხდა. პოლიციის ინფორმაციით, ცხრა ადამიანია დაკავებული.
როგორც ტელეკომპანია „მთავარი არხი“ აცხადებს, აქტივისტები დღისით პარლამენტის წინ შეშისგან ნაძვის ხის დადგმას აპირებდნენ, მაგრამ მათი გეგმები ჩაიშალა.
