თბილისი, 28 დეკემბერი — Sputnik. გლდანში, ხიზანიშვილის ქუჩაზე ავტობუსების მარშრუტი ორი დღით შეიცვლება, იუწყება თბილისის მერია.
ხიზანიშვილის ქუჩის მონაკვეთზე, კერძოდ, ავტობუსების ბოლო გაჩერებიდან მერვე მიკრორაიონში მდებარე მშენებარე ეკლესიამდე, საგზაო მონაკვეთზე ასფალტის საფარის დაგების გამო დღეს, 28 და 29 დეკემბერს ავტობუსების მარშრუტები ნაწილობრივ შეიცვლება.
N23, N24, N33, N39 და N51 ავტობუსები ვეკუას ქუჩაზე გლდანის მეშვიდე მიკრორაიონის მხრიდან გადაუხვევენ მშენებარე ეკლესიის მიმართულებით და გზას ხიზანიშვილის ქუჩაზე მეტროსადგურ „ახმეტელის თეატრისკენ“ განაგრძობენ.
მასშტაბური სარემონტო სამუშაოები ვეკუასა და ხიზანიშვილის ქუჩებზე მიმდინარე წლის მაისში დაიწყო და 2020 წლის იანვარში უნდა დასრულდეს.
ვეკუასა და ხიზანიშვილის ქუჩების ჯამური სიგრძე დაახლოებით, რვა კილომეტრს შეადგენს. სარეაბილიტაციო სამუშაოებზე დედაქალაქის ბიუჯეტიდან 11 მლნ ლარზე მეტია გამოყოფილი.
