თბილისი, 15 დეკემბერი - Sputnik. ქართველმა მაშველებმა იპოვეს მამაკაცი, რომელიც ლენტეხში, მწვერვალ აილამაზე სამი ათასი მეტრის სიმაღლეზე იყო ჩარჩენილი, ნათქვამია საგანგებო სიტუაციების მართვის სამსახურის განცხადებაში.
მამაკაცის ძებნა წუხელ ღამით მას შემდეგ დაიწყო, რაც დახმარების ოპერატიული მართვის ცენტრ 112-ში დახმარების თხოვნით შეტყობინება შევიდა.
გავრცელებული ინფორმაციით, სამაშველო სამსახურში დარეკა ადამიანმა, რომელიც ასევე იმყოფებოდა მთის მწვერვალზე, მაგრამ უსაფრთხო ადგილზე გამოსვლა შეძლო.
დილიდან, ხილვადობის აღდგენის შემდეგ, სამაშველო ოპერაციაში ჩაერთო შინაგან საქმეთა სამინისტროს სასაზღვრო პოლიციის ვერტმფრენი და საგანგებო სიტუაციების მართვის სამსახურის განსაკუთრებულ სიტუაციებზე სწრაფი რეაგირების სამაშველო ჯგუფი.
დაშავებული მამაკაცი ვერტმფრენით გადაიყვანეს თბილისში, ღუდუშაურის სახელობის საავადმყოფოში. პირველადი სამედიცინო დახმარება მას პოლიციის ვერტმფრენში, გადაუდებელი დახმარებისა და საგანგებო სიტუაციების კოორდინაციის ცენტრის ექიმებმა აღმოუჩინეს.
