თბილისი, 13 დეკემბერი — Sputnik. თბილისში 22 დეკემბერს მწერალთა სახლის ინიციატივით ახალგაზრდა ისტორიკოსის, ლიტერატორისა და ინტელექტუალური კლუბის „რა? სად? როდის?" მოთამაშის ნიკა აგლაძის დასახმარებლად საქველმოქმედო აუქციონი გაიმართება.
ნიკა აგლაძეს თავის ტვინის კავერნომა დაუდგინეს. მას უკვე ჩაუტარდა ერთი ოპერაცია თურქეთში, რომელიც, სამწუხაროდ, წარუმატებელი აღმოჩნდა. ამჟამად ის საჭიროებს სასწრაფო ნეიროქირურგიულ ჩარევას უკვე გერმანიაში.
მწერალთა სახლის ინიციატივას შეუერთდნენ ქართველი მხატვრები, მწერლები, პოეტები, ლიტერატორები, ნიკას კოლეგები.
აუქციონზე გაიყიდება თანამედროვე ქართველი მხატვრების ნამუშევრები, ცნობილი ქართველი მწერლების სამახსოვრო ნივთები და ხელნაწერები, თანამედროვე ქართული და თარგმნილი ლიტერატურა, ხელნაკეთი ნივთები, ფოტოები, სუვენირები.
„აუქციონსა და გამოფენა-გაყიდვაში მონაწილეობის მიღება ნებისმიერ მსურველს შეუძლია", - აცხადებენ საქველმოქმედო ღონისძიების ორგანიზატორები.
ღონისძიება 12:00-დან 18:00 საათამდე ჩატარდება.
