ამასობაში ზაქარია ქუცნაშვილის, სოფო ქაცარავასა და შოთა შალელაშვილის კვალდაკვალ პარლამენტს ჯანდაცვის კომიტეტის თავმჯდომარე აკაკი ზოიძეც ტოვებს.
კვლავ აქტიურად საუბრობენ იმის შესახებ, რომ მალე ვადამდელი არჩევნები დაინიშნება. გამორიცხული არაა, რომ დაძაბულობის გამო გაცდენილი დროის ანაზღაურება დეპუტატებს რიგგარეშე სხდომებზე მოუწიოთ და დეკემბრის ბოლოს პარლამენტში ყოფნა დაებედოთ. პრინციპში, დეპუტატების უმრავლესობა ამის წინააღმდეგი არც იქნება, რადგან უმრავლესობამ შესანიშნავად იცის, რომ აპრილსა თუ ოქტომბერში საკანონმდებლო ორგანოს დატოვება მაინც მოუწევთ.
თუ 2012 წელს „ქართულმა ოცნებამ“ სხვადასხვა იდეოლოგიისა და მიმართულების, მაგრამ მაინც იდეალისტი და ცნობილი სახეები შეიყვანა პარლამენტში, 2016 წელი მილიონერ-მილიარდერების სიმრავლითა და სუს-ის ხელდასმული დეპუტატების სიმრავლით გამოირჩეოდა. საინტერესო ისაა, რა სტრატეგიას აირჩევს ახლა მმართველი პარტია, თუმცა ფაქტია, რომ საარჩევნო სიაზე მუშაობა უკვე დაწყებულია და, როგორც ჩანს, მასზე არა მხოლოდ ბიძინა ივანიშვილს, არამედ კახი კალაძესაც მიუწვდება ხელი. თუმცა, პარტიის თავმჯდომარეს უბრძანებია, რომ პირველ ოცეულს პირადად ის ჩამოწერს.
ამასობაში „ქართულ ოცნებაში“, რაც ბოლო 7 წელია ქვეყნის მოწყობის მოდელები არ განხილულა, ახლა განიხილება. უმრავლესობა უკვე პროპორციული საარჩევნო სისტემის კი არა, მთლიანად მაჟორიტარულის შემოღებაზე ფიქრობს. ამ მიზნით შემართული დიმიტრი ხუნდაძე ახლა ამომრჩევლების ხელმოწერების შეგროვებას იწყებს მთელი საქართველოს მასშტაბით. „ქართული ოცნების“ დეპუტატების ნაწილი კი უკვე ორპალატიანი პარლამენტის შემოღებაზე მსჯელობს. მოკლედ, პოლიტიკური ბაბილონის მინი-ვერსია, რაც 2020-ში გველოდებოდა, ბიძინა ივანიშვილს რომ პროპორციული არჩევნების მიღება დაეჟინებინა, აქვე შემოგვთავაზეს „ქართული ოცნების“ შესრულებით.
სწორედ ამ საკითხებზე მსჯელობისათვის მმართველი პარტია ცენტრალურ ოფისში იკრიბება.
რა თქმა უნდა, არჩევნები იმავე საარჩევნო სისტემით ჩატარდება, რითიც ტარდებოდა, მაგრამ მმართველ პოლიტიკურ ძალას, როგორც ჩანს, აზრთა მრავალფეროვნების და საკანონმდებლო ბრეინშტორმინგის ჩვენება სურს. ერთი კია, რომ ეს ამბავი სერიოზული დაპირისპირების, აქციებისა და ცხვირ-პირის მტვრევის ფონზე ჩაივლის და სულაც არ იყო აუცილებელი ხარის წინ წითელი ნაჭრის ფრიალი.
ჩვენ არ ვიცით, როგორ აფასებენ და რას წერენ საკუთარ სახელმწიფოებს დიპლომატები საქართველოში არსებული სიტუაციის შესახებ, მაგრამ ფაქტია, რომ, მაგალითად, აშშ-ის საელჩო ღიად გამოხატავს შეშფოთებას ქუჩაში დაძაბულობის ზრდის გამო და მხარეებს დიალოგისკენ მოუწოდებს.
რაც შეეხება ვადამდელ არჩევნებს, ექსპერტების ნაწილის მტკიცებით, ის სიტუაციას განმუხტავს, თუმცა სახელისუფლებო პარტიის სპიკერები კატეგორიულად გამორიცხავენ, რომ არჩევნები ოქტომბრამდე იქნება. ვადით იქნება თუ ვადაზე ადრე, საზოგადოებას მაინც მოუწევს პასუხის გაცემა კითხვაზე – სურს „ოცნების“ მმართველობა, აბრუნებს „ნაცებს“, თუ სურს რაიმე სხვა...
