თბილისი, 24 ნოემბერი - Sputnik. ძამას ხეობაში, სოფელ მუხილეთის მიმდებარე ტერიტორიაზე ხანძარს ებრძვიან, იწვის ტყის ქვედა საფარი, იუწყება Новости-Грузия ქარელის რაიონის სახანძრო სამსახურის უფროსზე, კახა ბარბაქაძეზე დაყრდნობით.
წინასწარი ინფორმაციით, ხანძარი 60-70 ჰექტარ მიწაზეა გავრცელებული.
ამჟამად ადგილზე 20 მეხანძრე-მაშველი მუშაობს, მობილიზებულია საჭირო ტექნიკა.
ნოემბერი ხანძრების გაჩენის კუთხით საკმაოდ რთული გამოდგა. ბოლო კვირის განმავლობაში ხანძარს ებრძოდნენ აჭარაში, სამეგრელო-ზემო სვანეთში, რაჭაში, გურიაში, ცაგერისა და ლენტეხის რაიონში.
გასულ კვირაში სამი-ოთხი დღის განმავლობაში ხანძარი ერთდროულად შვიდ ადგილას მძვინვარებდა. იწვოდა ტყის საფარი, ბალახი და ბუჩქნარი. მეხანძრე-მაშველებმა მოახერხეს ყველა კერის ჩაქრობა, მაგრამ პერიოდულად აალების ახალი კერები ჩნდება.
