ცნობილი პლასტიკური ქირურგი კოტე მათითაშვილი შარშან მეორედ დაქორწინდა. მისი რჩეული დიზაინერი ეკა ბალანჩივაძეა. ქორწინების შემდეგ წყვილმა თაფლობის თვე თურქეთში გაატარა. თანაცხოვრების დაახლოებით ერთი წლის თავზე, ივნისში მათ ურთიერთობას ოფიციალური სახე მისცეს და ხელი მოაწერეს.
ქორწინების სახლში გადაღებული ფოტო „გირჩის“ ერთ-ერთმა ლიდერმა ზურაბ ჯაფარიძემ გაავრცელა, რომელიც კოტე მათითაშვილის მეგობარია. როგორც ჩანს, ეკა ბალანჩივაძემ თეთრ კაბაზე უარი თქვა და მოვარდისფრო-მოიისფრო კაბა მეუღლის პერანგს შეუხამა.
წყვილს უამრავი საერთო ინტერესი აქვს. მათ შორის არის ხატვის სიყვარული. კოტეს ნახატები ეკამ მაისურებზე გადაიტანა, რომლებიც, დიზაინერის თქმით, საკმაოდ კარგად იყიდება. ზაფხულში კოტე და ეკა იტალიაში იყვნენ და სოციალურ ქსელში დიზაინერმა უამრავი ფოტო გამოაქვეყნა.
ცოტა ხნის წინ კოტე მათითაშვილმა „ფეისბუქზე“ რომანტიკული ფოტო გამოაქვეყნა, რომელსაც უამრავი მოწონება აქვს.
კოტე მათითაშვილი განსაკუთრებით პოპულარული გადაცემა „ექიმებში“ გამოჩენის შემდეგ გახდა. ის დამსახურებულად იკავებს ერთ-ერთი სიმპათიური ექიმი მამაკაცის წოდებას და რეიტინგებშიც ხშირად ხვდება. პირველი ქორწინებიდან ორივეს ჰყავს შვილები.
