თბილისი, 29 სექტემბერი - Sputnik. მსოფლიო თასის ჯგუფური ეტაპის მატჩში რაგბიში, რომელიც იაპონიაში მიმდინარეობს, უელსის ნაკრებმა ავსტრალიას მოუგო ანგარიშით 29:25.
D ჯგუფის ორ ლიდერს შორის თამაში დაიწყო საქართველო-ურუგვაის მატჩის დასრულებისთანავე, რომელშიც ჩვენმა გუნდმა დამაჯერებელი გამარჯვება მოიპოვა – 33:7.
უელსის ნაკრები პირველივე ტაიმიდან დაეუფლა უპირატესობას და შესვენების წინ ანგარიში იყო 23:8.
მეორე ტაიმში თამაში გათანაბრდა, მაგრამ ავსტრალიის ნაკრებს 15-ქულიანი ჩამორჩენის გადალახვა სჭირდებოდა. ორი ლელოს და წარმატებული გარდასახვის და ორი გატანილი საჯარიმოს მიუხედავად ავსტრალიელებმა მეტოქის დამარცხება ვეღარ შეძლეს.
კვირას გამართული მატჩების შემდეგ ჯგუფის ლიდერი გახდა უელსის ნაკრები 9 ქულით, შემდეგ მოდიან ავსტრალიის გუნდი (6 ქულა), საქართველო (5 ქულა), ურუგვაი (4) და ფიჯი (2).
შემდეგ მატჩს საქართველოს ნაკრები 3 ოქტომბერს ოსაკაში ფიჯის ნაკრებთან ითამაშებს. ქართველებს სჭირდებათ გამარჯვება, რათა გარანტირებული ჰქონდეთ მონაწილეობა მომდევნო მსოფლიო ჩემპიონატზე. ავსტრალიის გუნდი კი 5 ოქტომბერს ურუგვაის ნაკრებს შეერკინება.
