თბილისი, 23 სექტემბერი — Sputnik. სოფელ ბედიანში მდებარე ფსიქიატრიული საავადმყოფოს დირექტორმა გიორგი გულაშვილმა უარყო ინფორმაცია სამკურნალო დაწესებულების მოსალოდნელი დახურვის შესახებ.
ქართულ მასმედიაში ვრცელდება ინფორმაცია, რომ საავადმყოფოს თანამშრომლები, დაწესებულების დახურვის მოლოდინში, 1 ოქტომბრიდან გაფიცვის დაწყებას აპირებენ. გავრცელებული ინფორმაციით, იგეგმება შენობის რემონტი, რასთან დაკავშირებითაც თანამშრომლებს ექვსთვიან უხელფასო შვებულებაში უშვებენ. ეს გახდა შეშფოთების მიზეზი.
„არანაირი გაფიცვა არ არის, საავადმყოფო ჩვეულ რეჟიმში მუშაობს", – განუცხადა გულაშვილმა „Sputnik-საქართველოს".
ბედიანის საავადმყოფოში დაახლოებით 150 პაციენტი მკურნალობს. კლინიკის დახურვის შემთხვევაში მათ ნაწილს გაწერენ, ხოლო ნაწილს სხვადასხვა საავადმყოფოში გადაანაწილებენ, წერენ ქართულ მასმედიაში.
