თბილისი, 11 სექტემბერი — Sputnik. კომპანია Apple-მა ახალი თაობის ახალი „ჭკვიანი საათის“ Watch Series 5 რეკლამა გადაიღო, რომელშიც მონაწილეობენ ახალგაზრდა მსახიობები საქართველოდან.
მსახიობთა კასტინგი ჩაატარა ქართულმა პროდაქშნ-კომპანია Metro Productions-მა. სწორედ მან შეარჩია კორპორაცია Apple-სთვის ხუთი გამორჩეული გარეგნობის მსახიობი.
ეს მსახიობები არიან: ვიკა კალანდია, დავით ბეკოშვილი, ბექა ქამხაძე, ირმა ლაპიაშვილი და კობა შონია. მსახიობების შერჩევაზე პასუხისმგებელი იყო კასტინგ-მენეჯერი თინა ხიზანიშვილი.
„მეტრო პროდაქშენისა და საერთაშორისო ბაზრის კიდევ ერთი მეგობრობის შედეგი! დღეს ეფლის რეკლამაში ხუთი ქართველი მსახიობია! ვამაყობთ, რომ ვიყავით Apple-ის რეკლამის პატარა, მაგრამ მნიშვნელოვანი ქასთინგის ორგანიზების ნაწილი", – ნათქვამია ქართული კომპანიის განცხადებაში.
Apple ამერიკული კორპორაციაა, რომელიც აწარმოებს პერსონალურ და პლანშეტურ კომპიუტერებს, აუდიოფლეიერებს, ტელეფონებს, პროგრამულ უზრუნველყოფას.
