თბილისი, 9 სექტემბერი – Sputnik. თბილისის ერთ–ერთი ცენტრალური, კანდელაკის ქუჩა სარემონტო სამუშაოების გამო ოთხშაბათამდე ჩაიკეტება, ნათქვამია დედაქალაქის მერიის ვებგვერდზე.
მერიის ინფორმაციით, ქალაქის ინფრასტრუქტურული განვითარების სამსახური კანდელაკის ქუჩის შეკეთებას ასრულებს. ამასთან დაკავშირებით ქუჩა ორშაბათს 20:00 საათიდან 11 სექტემბრის დილის 07:00 საათამდე ჩაიკეტება.
თბილისის მერიამ კანდელაკის ქუჩის კაპიტალური შეკეთება მარტიდან დაიწყო. სამუშაოების ფარგლებში მთლიანად შეიცვალა მიწისქვეშა კომუნიკაციები. იგეგმება ტროტუარისა და ბორდიურების კეთილმოწყობა.
ასფალტის საფარი გზის 1,2 კილომეტრიან მონაკვეთზე განახლდება. პროექტის რეალიზაციისთვის მერიამ 1,4 მილიონი ლარი გამოყო.
