თბილისი, 6 სექტემბერი — Sputnik. ქართველი სტუდენტი სანდრო დათიშვილი შოტლანდია-საქართველოს შორის რაგბის მატჩის საყურებლად ედინბურგში ველოსიპედით ჩავიდა, იუწყება უცხოური მედია.
თავად სანდრო დათიშვილი საკუთარ ფეისბუქ−გვერდზე ერთგვარ დღიურს აწარმოებდა საკუთარი მოგზაურობის შესახებ, რომლის ბოლო ჩანაწერშიც გამოქვეყნებულია ედინბურგის აბრის ფონზე გადაღებული ფოტო წარწერით:
„არის თუ არა ეს ედინბურგი?!“
გავრცელებული ინფორმაციით, 25 წლის სტუდენტმა და რაგბის ქომაგმა ბრიტანეთის ვიზა გერმანიაში მიიღო, რის შემდეგაც საფრანგეთისა და ინგლისის გავლით შოტლანდიაში მოხვდა.
სანდრო დათიშვილმა მოგზაურობა 1 ივნისს დაიწყო, გაიარა 5,358 კმ-ზე მეტი და დანიშნულების ადგილზე 4 სექტემბერს მიაღწია. დათიშვილი ველოსიპედით დღეში 120 კმ-ს გადიოდა. ღამეს კარავში ათევდა, ხოლო დიდ ქალაქებში რამდენიმე დღით ჩერდებოდა.
სანდრო დათიშვილი და მისი მეგობარი დაჩი ხუციშვილი, რომელიც ედინბურგში სწავლობს, 6 სექტემბერს მარიფილდის სტადიონზე „ბორჯღალოსნებისა“ და შოტლანდიის ნაკრების მატჩს დაესწრებიან.
