თბილისი, 13 აგვისტო — Sputnik. უეფას დისციპლინარულმა კომიტეტმა არ დააკმაყოფილა თბილისის „დინამოს“ საჩივარი, მიღებული გადაწყვეტილება არ შეიცვლება – ჰოლანდიურ „ფეიენოორდთან“ თბილისის „დინამოს“ მატჩი 15 აგვისტოს მაყურებლის გარეშე ჩატარდება, იუწყება საზოგადოებრიცი მაუწყებლის პირველი არხი.
გარდა ამისა, ფინანსური სასჯელის სახით თბილისის კლუბმა 50 ათას ევრო უნდა გადაიხადოს, მატჩის დროს ტრიბუნებზე კი დამონტაჟებული უნდა იყოს ბანერი – #equalgame.
მატჩი 15 აგვისტოს „დინამო არენას“ სტადიონზე ჩატარდება.
ტელეკომპანიის ინფორმაციით, მსგავსი გადაწყვეტილება უეფამ მიიღო „დინამოს“ ქომაგების რასისტული საქციელის გამო ევროპა ლიგის მეორე საკვალიფიკაციო რაუნდის მატჩში აზერბაიჯანულ კლუბ „გაბალასთან“.
1 აგვისტოს თბილისის „დინამომ“ აზერბაიჯანის „გაბალას“ საშინაო მატჩში 3:0 მოუგო (ორი მატჩის ჯამით 5:0) და ტურნირის მომდევნო წრეში გავიდა.
