თბილისი, 6 აგვისტო — Sputnik. წყალტუბოში, სათაფლიის ტყეში ორ მოქალაქეს გზა აებნა და უსაფრთხო ადგილას გამოსვლას ვერ ახერხებდა, იუწყება შინაგან საქმეთა სამინისტროს საგანგებო სიტუაციების მართვის სამსახური.
ინფორმაცია დაკარგულების შესახებ გადაუდებელი დახმარების ოპერატიულ მართვის ცენტრ „112"-ში შევიდა.
შეტყობინების მიღებისთანავე ტურისტების დასახმარებლად გავიდა იმერეთის მთავარი სამმართველოს სამაშველო ჯგუფი.
საძიებო სამუშაოების შედეგად, სათაფლიის ნაკრძალში ნაპოვნია დაკარგული საქართველოს ორი, 17 წლის მოქალაქე. ისინი მეხანძრე-მაშველებმა უსაფრთხო ადგილზე გადაიყვანეს. მათ სიცოცხლეს და ჯანმრთელობას საფრთხე არ ემუქრება.
საძიებო სამუშაოებში სახანძრო-სამაშველო ჯგუფის გარდა, ჩართული იყო წყალტუბოს კრიმინალური პოლიციის ჯგუფი და სათაფლიის ნაკრძალის რეინჯერი.