თბილისი, 13 ივლისი — Sputnik. ლენტეხის რაიონში ადგილობრივი ხელისუფლება გადაუდებელი წვიმებით გამოწვეულ შედეგებს ებრძვის - წაღებულია გზები და ხიდები, დაიტბორა საკარმიდამო ნაკვეთები.
წყალდიდობის შედეგები ხარაგაულის რაიონში – ვიდეო შემთხვევის ადგილიდან >>
ამჟამად მიმდინარეობს აღდგენითი სამუშაოები სოფელ ტვიბის გზაზე, რომელიც პარასკევიდან გარე სამყაროს არის მოწყვეტილი. გზის 30 მეტრიანი მონაკვეთი წაიღო ადიდებულმა მდინარე მუხრიმ, ნათქვამია ლენტეხის მუნიციპალიტეტის Facebook-გვერდზე.
გარდა ამისა, დაზიანებულია ჭველფი-ლუჯის დამაკავშირებელი ხიდის ბურჯი, ლუჯი-სასაშის დამაკავშირებელი გზა, სასაში-ლუჯის დამაკავშირებელი ხიდი. ავარიულ მდგომარეობაშია შკედი-ჩიხარეშის დამაკავშირებელი ხიდი.
ტექნიკა მობილიზებულია, მაგრამ ამ ეტაპზე წვიმების გამო სამუშაოების შესრულება დროებით შეფერხებულია.
სოფელ მელეში ადიდებული ღელე გადმოვიდა კალაპოტიდან და დააზიანა სოფლის ცენტრალური გზა. სოფლებში: ხელედში, ბაბილში, ყარიშში, ლასკადურაში დაზიანებულია შიდა სასოფლო გზები.
შაბათს ლენტეხში გამოიდარა და ადგილობრივი ხელისუფლება ვარაუდობს, რომ საღამოსთვის ყველა დაზიანებული გზა აღდგება.
