თბილისი - 10 ივლისი - Sputnik. უცხოელი პროფესორები და ექსპერტები ქართველი ახალგაზრდებისთვის მასტერ-კლასებსა და ვორქშოფებს ჩაატარებენ, განაცხადა თბილისის მერმა კახა კალაძემ ოთხშაბათს დედაქალაქის მთავრობის სხდომაზე.
თბილისში ქართული სამზარეულოს მასტერ-კლასი გაიმართება >>
პროექტს დედაქალაქის მერია ქართულ უნივერსიტეტებთან ერთად ახორციელებს. სულ მასტერ-კლასებსა და ვორქშოფებში მონაწილეობას მიიღებს ათასამდე ქართველი სტუდენტი.
„პროექტის ფარგლებში უკვე დაფინანსდა რვა უცხოელი ექსპერტის ვიზიტი თბილისში, რომლებიც ჩაატარებენ მასტერ-კლასებსა და ვორქშოფებს არქიტექტურის, ურბანული განვითარების, კულტურის, მენეჯმენტის, საზოგადოებრივი ჯანდაცვისა და ხელოვნების მიმართულებით“, – აღნიშნა კალაძემ.
მისი თქმით, არქიტექტურისა და ურბანული განვითარების სფეროები ძალიან მნიშვნელოვანია დედაქალაქისთვის, თუმცა საქართველოში მაღალი კლასის სპეციალისტების ნაკლებობაა.
სპეციალისტები თბილისს ეწვევიან საფრანგეთიდან, გერმანიიდან, ჩეხეთიდან, იტალიიდან და ლატვიიდან. გარდა ლექცია-სემინარებისა, უცხოელი ექსპერტების შეხვედრები გაიმართება მერიის შესაბამის საქალაქო სამსახურებთანაც.
