პროდიუსერი ნოე სულაბერიძე და „მის საქართველო“ ჯანეტ ქერდიყოშვილი თაფლობის თვეს ესპანეთში მდებარე საზღვაო კურორტ პალმა-დე-მალიორკაზე ატარებენ.
გრანდიოზული ქორწილის შემდეგ, რომელიც ერთი კვირის წინ შედგა, წყვილი ჯერ დიდ ბრიტანეთში გაემგზავრა, ახლა კი, როგორც „ინსტაგრამზე“ გამოქვეყნებული ფოტოებიდან ჩანს, თავისუფალ დროს კუნძულზე ატარებენ.
ლონდონში ნოე სულაბერიძის საქმიან ვიზიტს წყვილმა დასვენება შეუთავსა.
ერთი კვირის წინ წყვილის გრანდიოზულმა ქორწილმა საზოგადოება აალაპარაკა. წყვილმა ქორწილი რესტორან „ბაგრატიონში“ გადაიხადა, სადაც უამრავი ცნობილი სახე შეიკრიბა.
წყვილმა ჯვარი სამების ტაძარში დაიწერა. ნოეს მეჯვარეები დეტექტივი გია ბესელია, გოგიტა ზაქრაძე და ირაკლი მაქაცარია იყვნენ, ხოლო ჯანეტის მეჯვარეები – საზოგადოებისთვის უცნობი სახეები.
პატარძალი რესტორანში ხელის მოწერის ცერემონიაზე მამამ მიიყვანა.
ნოე სულაბერიძისთვის ეს მესამე ქორწინებაა, ჯანეტისთვის - პირველი. ნოე ორი შვილის მამაა. მისი მეორე მეუღლე ცნობილი წამყვანი, Rustavi 2-ის სახე ეკა სამხარაძე იყო. მათ ერთი ქალიშვილი ჰყავთ.
წყვილი აპრილში მოულოდნელად დაინიშნა. ქორწინებას წინ უძღოდა წინასაქორწინო წვეულება, რომელიც 6 ივნისს ჯანეტმა სასტუმრო „სტამბაში“ მოაწყო.
ჯანეტ ქერდიყოშვილმა ბავშვობა რუსეთში გაატარა, სკოლის დასრულების შემდეგ კი სასწავლებლად საქართველოში ჩამოვიდა. თსუ-ს დამთავრების შემდეგ საქართველოდან იტალიაში გაემგზავრა, სადაც დიზაინის ფაკულტეტზე განაგრძო სწავლა.