თბილისი, 13 ივნისი — Sputnik. გურჯაანის მუნიციპალიტეტის სოფელ კაჭრეთში სამსახურებრივი მოვალეობის შესრულების დროს დენის დარტყმის შედეგად „საქართველოს სახელმწიფო ელექტროსისტემის“ თანამშრომელი შოთა მთავარაშვილი დაიღუპა, იუწყება Imedinews.
უბედური შემთხვევა გუშინ, გვიან ღამით მოხდა, იმ დროს, როდესაც 33 წლის შოთა მთავარაშვილი, რომელიც ქვესადგურების ჯგუფის უფროსი იყო, ფიდერზე აღდგენით სამუშაოებს ატარებდა. შემთხვევის გამომწვევ კონკრეტულ მიზეზს გამოძიება დაადგენს.
წუხელ გურჯაანის მუნიციპალიტეტის აბონენტების ნაწილს ელექტროენერგიის მიწოდება შეუწყდა, რაც, სავარაუდოდ, ძლიერმა ქარმა და წვიმამ გამოიწვია. გარდაცვლილის ოჯახის წევრები ამბობენ, რომ შოთა მთავარაშვილი კაჭრეთში სწორედ ამ ავარიის სალიკვიდაციოდ გამოძახეს.
გამოძიება სსკ-ის 240-ე პრიმა მუხლის მეორე ნაწილით დაიწყო, რაც ელექტროუსაფრთხოების წესების დარღვევას გულისხმობს, რამაც ადამიანის სიცოცხლის მოსპობა გამოიწვია.
