თბილისი, 24 აპრილი - Sputnik. საინფორმაციო სააგენტო „Sputnik-საქართველოს“ ჟურნალისტები შეხვდნენ თბილისელ სკოლის მოსწავლეებს, რომელთაც მომავალში მასობრივი ინფორმაციის საშუალებებში მუშაობის სურვილი აქვთ. მასტერკლასი „Sputnik-საქართველოს“ მულტიმედიურ პრესცენტრში ახალი პროექტის - Sputnik Taoba-ს ფარგლებში გაიმართა.
პროექტი Sputnik Taoba ითვალისწინებს გაცნობით ექსკურსიას სააგენტოში და მულტიმედიურ პრესცენტრში სკოლის მოსწავლეების, სტუდენტებისა და ახალგაზრდა ჟურნალისტებისთვის მულტიმედიურ მასტერკლასებს.
№98 სკოლის უფროსკლასელებს შეხვდნენ „Sputnik-საქართველოს“ პროდიუსერი ნაზი ჟორჟოლიანი და ჟურნალისტი ნოდარ მაისურაძე. პირველი ლექცია შეხვედრების სერიის ფარგლებში მიეძღვნა ჟურნალისტიკის საწყისებს და მასმედიის მუშაობის საფუძვლებს. ჟურნალისტები დამსწრეებს ჟურნალისტიკის თანამედროვე პრობლემებსა და საზოგადოებრივ აზრზე მასმედიის გავლენაზე ესაუბრნენ.
მონაწილეებმა აღნიშნეს, რომ ტრენინგის წყალობით გაიგეს, როგორ უნდა აიყოლიო მკითხველი სათაურის მეშვეობით და არ დაუკარგო ინტერესი სტატიის კითხვისას.
სპიკერემა სკოლის მოსწავლეებს შესთავაზეს ამა თუ იმ სტატიისთვის სათაურების, ანუ თავიანთი ვარიანტების მოფიქრება.
გამოცდილების გაზიარება ამით არ დასრულებულა: ახალგაზრდებისთვის სრულყოფილი სურათის შესაქმნელად „Sputnik-საქართველოს“ თანამშრომლებმა მათ ე.წ. „ნიუსრუმები“ დაათვალიერებინეს. სკოლის მოსწავლეებს შესაძლებლობა ჰქონდათ ენახათ, როგორ იწერება ახალი ამბები, როგორ მუშაობს საინფორმაციო სააგენტოს მულტიმედიური რედაქცია.
იმისათვის, რომ ლექციებმა შედეგი გამოიღოს, ჟურნალისტებმა სკოლის მოსწავლეებს პრაქტიკული საშინაო დავალებაც მისცეს. საუკეთესო ნამუშევრები „Sputnik-საქართველოს“ ვებგვერდზე გამოქვეყნდება.
უფროსკლასელებმა პროექტი მოიწონეს და მას შემეცნებითი და პროფესიული ორიენტაციისთვის სასარგებლო უწოდეს.
„ჟურნალისტიკა ბავშვობიდან მაინტერესებდა. ყოველთვის მინდოდა გამეგო, როგორ იქმნება ახალი ამბები. დღევანდელი ლექცია ყველა ჩვენგანისთვის შემეცნებითი იყო. ვფიქრობ, დღეს წარმოდგენა შეგვექმნა იმაზე, თუ როგორ მუშაობს მედია“, - აღნიშნა პროექტის ერთ-ერთმა მონაწილემ ლუკა ხუციშვილმა.
2019 წლის მაისში სკოლის მოსწავლეები Sputnik Taoba მასტერკლასებში მონაწილეობას გააგრძელებენ.
