თბილისი, 20 აპრილი — Sputnik. ბათუმის ისტორიულ ნაწილში საცხოვრებელ სახლში ხანძრის ლიკვიდაციის შემდეგ მეხანძრეებმა ოქროს სამკაულები იპოვეს, ნათქვამია შსს-ს საგანგებო სიტუაციების მართვის სამსახურის Facebook-გვერდზე გავრცელებულ განცხადებაში.
ხანძარი კომახიძის ქუჩაზე შაბათს დილით გაჩნდა. საგანგებო სიტუაციების მართვის სამსახურის მონაცემებით, ხანძრის შედეგად დამწვარია 450 კვადრატული მეტრი ფართობი.
„მეხანძრე-მაშველების დროული რეაგირების შედეგად მოხერხდა შენობის მნიშვნელოვანი ნაწილის გადარჩენა. ხანძრის ქრობისას მეხანძრე-მაშველებმა დიდი რაოდენობით ძვირფასეულობა აღმოაჩინეს. აღმოჩენილი ძვირფასეულობა დაუბრუნდა მეპატრონეს“, - ნათქვამია განცხადებაში.
ადგილზე 11 სახანძრო ბრიგადა მუშაობდა.
ადრე ბათუმის მერიაში განაცხადეს, რომ რვა დაზარალებულ ოჯახს დროებითი საცხოვრებელი ფართი შესთავაზეს.
პირველი არხის მონაცემებით, შინაგან საქმეთა სამინისტრომ გამოძიება საქართველოს სსკ-ს 187-ე მუხლის მე-2 ნაწილით დაიწყო, რაც ცეცხლის წაკიდებით ნივთის დაზიანებას ან განადგურებას გულისხმობს. აღნიშნული დანაშაული 3-დან 5 წლამდე პატიმრობას ითვალისწინებს.
