თბილისი, 4 აპრილი — Sputnik. საქართველოს რეგიონების გაზიფიკაციის თანახმად, 2019-2022 წლებში ბუნებრივი აირით 217 დასახლებული პუნქტი მომარაგდება, განაცხადა პრემიერ-მინისტრმა მამუკა ბახტაძემ ხუთშაბათს გამართულ პრესკონფერენციაზე.
ბუნებრივი აირით სარგებლობას 1,2 მილიონზე მეტი აბონენტი შეძლებს. ეს ნიშნავს, რომ მოსახლეობის გაზიფიკაციის დონე 85%-ს შეადგენს, აღნიშნა პრემიერმა.
განსახორციელებელ სამუშაოებზე ინვესტიციები 210 მილიონ ლარს შეადგენს.
„აღნიშნული ინვესტიციების განხორციელების შემდეგ, როდესაც 85 პროცენტიან ნიშნულს მივაღწევთ, საქართველო გაზიფიცირების თვალსაზრისით რეგიონში ერთ-ერთი ლიდერი იქნება“, – განაცხადა მამუკა ბახტაძემ.
ამჟამად საქართველოში როგორც ბუნებრივი აირის, ისე ნავთობისა და ნავთობპროდუქტების ძირითადი მომწოდებელი არის კომპანია SOCAR-ი. კომპანიის შვილობილი კომპანიები ქვეყანაში ახორციელებენ გაზგამანაწილებელი სისტემების გაფართოებას და მოდერნიზაციას, SOCAR-ის ბრენდის ქვეშ ავტოგასამართი სადგურების ქსელის განვითარებას, ასევე ყულევის პორტში ფლობენ ნავთობის ტერმინალს, საიდანაც მსოფლიო ბაზრებზე აზერბაიჯანული ნავთობისა და ნავთობპროდუქტების გადაზიდვა ხდება.
SOCAR Georgia Gas-მა 2008 წლიდან საქართველოში 290 მილიონი დოლარის ინვესტიცია განახორციელა და 250 ათასი აბონენტის გაზიფიცირება მოხდინა. SOCAR-ი საქართველოს მასშტაბით 590 ათას აბონენტს ემსახურება.
