თბილისი, 1 აპრილი — Sputnik. ანაკლიის ღრმაწყლოვან პორტთან მისასვლელი საავტომობილო გზისა და რკინიგზის საპროექტო დოკუმენტაციის მოსამზადებლად გამოცხადებულ კონკურსში გაიმარჯვა ავსტრალიურმა მულტინაციონალურმა კომპანიამ SMEC („სმექი"), აღნიშნულია საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის მიერ გავრცელებულ განცხადებაში.
კონსორციუმი: ფულის გათეთრების საქმე ანაკლიის პორტის მშენებლობას ხელს უშლის>>>
გზების მშენებლობაზე პირველად ტენდერი 2018 წელს სამ ეტაპად გამოცხადდა, თუმცა მაშინ იგი რიგი მიზეზების გამო ჩავარდა. ამჯერად ხელისუფლებამ ტენდერის წესების შეცვლა და ხელახლა გამოცხადება გადაწყვიტა და კონკურსი განსხვავებული წესით მიმდინარე წლის თებერვლის ბოლოს გამოაცხადა.
ინტერესთა გამოხატვის პირველ ეტაპზე საპროექტო დოკუმენტაციის მოსამზადებლად დაინტერესება სულ ოთხმა კომპანიამ გამოხატა. მონაწილეებს შორის ერთი ქართული კომპანიებისგან შემდგარი ამხანაგობა იყო. ასევე წინადადებები წარმოადგინეს ესპანურმა, ხორვატიულმა და ავსტრალიურმა კომპანიებმა. ტექნიკური და ფინანსური წინადადებების გახსნის ეტაპზე სამი კომპანია გადავიდა. უწყების ცნობით, საუკეთესო წინადადება როგორც ტექნიკური, ისე ფინანსური კუთხით ავსტრალიურმა კომპანია SMEC-მა წარმოადგინა.
კონკურსი ორ ეტაპად ჩატარდა. პირველ ეტაპზე შეფასდა ტექნიკური წინადადებები (შეფასების წონა 80%-ით განისაზღვრა), ხოლო მეორე ეტაპზე – ფინანსური წინადადებები (შეფასების წონა 20%-ს შეადგენდა).
SMEC-მა ანაკლიის ღრმაწყლოვან ნავსადგურთან მისასვლელი საავტომობილო გზისა და რკინიგზის საპროექტო დოკუმენტაცია შვიდ თვეში უნდა მოამზადოს. პროექტირების სახელშეკრულებო ღირებულება 7 მილიონ ლარს შედგენს.
„იაფფასიანი სპეკულაცია“ - პრემიერმა ანაკლიის პორტთან დაკავშირებით სკეპტიკოსებს უპასუხა>>>
კომპანია SMEC-ი 1949 წელს დაფუძნდა და ავსტრალიური კომპანია SJ-ს ჯგუფის წევრია. იგი ცნობილი საკონსულტაციო კომპანიაა, რომელსაც პროექტები განხორციელებული აქვს აზიაში, სამხრეთ და ჩრდილოეთ ამერიკაში, აფრიკაში და ავსტრალიაში. კომპანია მსოფლიოს 40-ზე მეტ ქვეყანაში 130-მდე ოფისითაა წარმოდგენილი. კომპანიის საქმიანობის სფეროს ხიდების, გზების, აეროპორტების, რკინიგზის, გვირაბების, ჰესებისა და მეტროს პროექტირება წარმოადგენს. კომპანიის წლიური ბრუნვა საშუალოდ 350-360 მილიონი აშშ დოლარია.
ანაკლიის პორტი – როგორი იქნება იგი
საქართველოში პირველი ღრმაწყლოვანი პორტის მშენებლობას ახორციელებს კომპანია „ანაკლიის განვითარების კონსორციუმი", რომელიც დააარსეს ქართულმა კომპანია TBC Holding-მა და ამერიკულმა დეველოპერულმა კომპანია Conti International LLC-მა. დღეისათვის კონსორციუმში ასევე შედიან პორტის ოპერატორი SSA Marine (აშშ), British Wondernet Express (ცენტრალური აზია) და G-Star Ltd. (ბულგარეთი).
პორტის ამოქმედება 2021 წლისთვის იგეგმება. პორტის განვითარება დაგეგმილია ცხრა ფაზად.
მშენებლობის პირველ ეტაპზე, სამი-ოთხი წლის განმავლობაში დაგეგმილია აშენდეს პორტი სატვირთო გემებისთვის, კონტენეირების ტერმინალი, ჯებირი და ეზო ინტერმოდალური სარკინიგზო გადაზიდვებისთვის. პირველ ეტაპის დასრულების შემდეგ პორტი 900 ათასი კონტეინერის მიღებას შეძლებს. მეორე ფაზის ამოწურვის შემდეგ, 2030 წლისთვის კი პორტის გამტარუნარიანობა 14 მლნ ტონა ტვირთზე მეტი იქნება.
პროექტის ავტორების გათვლით, ცხრავე ფაზის დასრულებას 50 წელზე მეტი დასჭირდება და ამ დროისთვის, კონსორციუმის პროგნოზით, იგი ყოველწლიურად 100 მილიონ ტონაზე მეტი ტვირთის მიღებას შეძლებს.
პროექტის საერთო ღირებულება 2,5 მლრდ დოლარია.
