თბილისი, 25 თებერვალი — Sputnik. ქუთაისის საფეხბურთო კლუბი საქართველოს სუპერთასის მფლობელი გახდა. ამ სეზონიდან სუპერთასი გამოჩენილი ქართველი ფეხბურთელის სლავა მეტრეველის სახელს ატარებს.
გორში გამართულ მატჩში „ტორპედომ" მინიმალური ანგარიშით 1:0 ქვეყნის მოქმედ ჩემპიონს „საბურთალოს" მოუგო.
შეხვედრა საკმაოდ მდორე ტემპში დაიწყო, თუმცა, შესვენების შემდეგ ტორპედოელები გააქტიურდნენ. ამან შედეგი გამოიღო და 70-ე წუთზე, როდესაც თენგიზ ცინცაძემ საჯარიმო გაათამაშა, მერაბ გიგაურმა ბურთის ბადეში შეგდება მოახერხა.
კახაბერ ჩხეტიანის გუნდი სუპერთასის მფლობელი ზედიზედ მეორედ გახდა.
საქართველოს ჩემპიონატის ეროვნული ლიგა 2019 წლის 1 მარტს იწყება. ქუთაისის „ტორპედო" პირველ მატჩს ბოლნისის „სიონის" წინააღმდეგ 2 მარტს გამართავს.
