თბილისი, 20 თებერვალი — Sputnik. პოლიციამ ბათუმში სწრაფი ჩარიცხვის აპარატების გაქურდვის 14 ფაქტი გახსნა და 27 წლის მამაკაცი დააკავა, ნათქვამია შინაგან საქმეთა სამინისტროს ვებ-გვერდზე გავრცელებულ განცხადებაში.
გამოძიების ცნობით, ბრალდებული იმავე აპარატების საშუალებით ინტერნეტ-ტოტალიზატორ Europabet-ის ანგარიშზე თანხების თაღლითური გზით გადარიცხვასაც ცდილობდა.
ბრალდებული მოსამართლის განჩინების საფუძველზე დააკავეს.
გამოძიება ქურდობის და თაღლითობის ფაქტებზე საქართველოს სსკ-ის 177-ე მუხლის მე- 2 ნაწილის „ა" და „ბ" ქვეპუნქტებით, ასევე 180-ე მუხლის მე-2 ნაწილის „ბ" ქვეპუნქტით მიმდინარეობს. დანაშაული 4-დან 7 წლამდე ვადით თავისუფლების აღკვეთას ითვალისწინებს.
