თბილისი, 14 თებერვალი – Sputnik. რუსთავში დღეს დედა-შვილი, სავარაუდოდ, ბუნებრივი აირის ნამწვით მოიწამლა, იუწყება საზოგადოებრივი მაუწყებლის პირველი არხი.
სასწრაფო-სამედიცინო დახმარების ბრიგადას 37 წლის ქალი უგონო მდგომარეობაში დახვდა, 14 წლის მოზარდი კი კონტაქტური იყო.
დედა-შვილი რუსთავის ცენტრალურ საავადმყოფოში გადაიყვანეს.
ექიმების განცხადებით, ამ ეტაპზე მათი ჯანმრთელობის მდგომარეობა სტაბილურია.
ბოლო პერიოდში ბუნებრივი აირის გაჟონვის თემა საქართველოში საკმაოდ მტკივნეულია. იანვარში თბილისში, დიდი დიღმის ერთ-ერთ მრავალსართულიან სახლში მომხდარი აფეთქების შედეგად ოთხი ადამიანი გარდაიცვალა, მათ შორის, ოთხი წლის ბავშვი. მომდევნო დღეებში ბუნებრივი აირის გაჟონვამ ვარკეთილში ორი მამაკაცი იმსხვერპლა. 31 იანვარს ისნის რაიონში CO-ს დაგროვების შედეგად შვიდი ადამიანი გარდაიცვალა, ხოლო 1 თებერვალს კი თემქაზე ბუნებრივი აირის ნამწვით ექვსი ადამიანი მოიწამლა. ბუნებრივი აირით ინტოქსიკაციის შემთხვევები დაფიქსირდა რუსთავსა და გორშიც.
