თბილისი, 8 თებერვალი — Sputnik. კორნელი კეკელიძის სახელობის საქართველოს ხელნაწერთა ეროვნულ ცენტრში 8 თებერვალს იხსნება გამოფენა „დავით აღმაშენებლის ეპოქის ხელნაწერი მემკვიდრეობა", იუწყებიან ორგანიზატორები.
ექსპოზიციის დამთვალიერებლები იხილავენ უნიკალურ ექსპონატებს, რომლებიც აღმაშენებლის ეპოქის მდიდარ ლიტერატურულ ტრადიციებს ასახავს. მათ შორისაა ორიგინალური ხელნაწერები „ქართლის ცხოვრება", „გალობანი სინანულისანი", „რუის-ურბნისის ძეგლიწერა" და სხვ.
ამას გარდა, ღონისძიების ფარგლებში ხელნაწერთა ცენტრში დაგეგმილია ლექციები დავით აღმაშენებლის მეფობის ისტორიის შესახებ და სხვადასხვა საგანმანათლებლო ღონისძიება მოსწავლეებისთვის.
გამოფენის გახსნას დაესწრებიან საქართველოს განათლების, მეცნიერების, კულტურისა და სპორტის მინისტრი მიხეილ ბატიაშვილი, პარლამენტის განათლების, მეცნიერებისა და კულტურის საკითხთა კომიტეტის თავმჯდომარე მარიამ ჯაში, თბილისის სახელმწიფო უნივერსიტეტის რექტორი გიორგი შარვაშიძე და სამეცნიერო წრეების წარმომადგენლები.
დღეს „დავითობაა" – წმინდა მეფის დავით აღმაშენებლის ხსენების დღე>>
გამოფენა დღეს, 18:00 საათზე გაიხსნება და 15 თებერვლამდე გასტანს.
