თბილისი, 24 იანვარი — Sputnik. მელორ ვაჩნაძე გერმანიაში ქურდობისთვის დააკავეს, იუწყება ტელეკომპანია Imedi.
შემთხვევა რამდენიმე დღის წინ ქალაქ კიოლნში მოხდა.
გავრცელებული ინფორმაციით, ვაჩნაძემ TK Maxx-ის მაღაზიაში ძვირადღირებული ფეხსაცმელი მოიზომა და მაღაზიის დატოვებას ახალი ფეხსაცმლით შეეცადა. თუმცა, აღნიშნული ფაქტი მაღაზიის უსაფრთხოების სამსახურის თანამშრომლებმა ვიდეოკამერების საშუალებით დააფიქსირეს და ვაჩნაძე დააკავეს.
მელორ ვაჩნაძემ, რომელიც მმართველი პარტია „ქართული ოცნება - დემოკრატიული საქართველოს" მხარდამჭერი და ასევე მოძრაობა „ქართული მარშის" წევრი იყო, საქართველო გასული წლის ნოემბერში ხმაურით დატოვა.
ქვეყნის დატოვების შესახებ გადაწყვეტილება ვაჩნაძემ მმართველი პარტიის მხრიდან პოლიტიკური ზეწოლით ახსნა. მანამდე ტელეკომპანია Rustavi2-სთვის მიცემულ ინტერვიუში მელორ ვაჩნაძემ განაცხადა, რომ „ქართული ოცნება" მის დაკავებას გეგმავდა, რადგან მან არჩევნებში დახმარებაზე უარი განაცხადა.
საქართველოდან წასვლის შემდეგ იგი გერმანიაში ცხოვრობდა.