თბილისი, 22 იანვარი — Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა აჭარის, ქვემო ქართლისა და სამეგრელო–ზემო სვანეთის რეგიონებში კონტრაბანდის სამი ფაქტი გამოავლინეს და ერთი პირი დააკავეს, ნათქვამია უწყების მიერ გავრცელებულ განცხადებაში.
სამართალდამცველებმა ნივთმტკიცების სახით სარეალიზაციოდ განკუთვნილი, სხვადასხვა დასახელების დიდი ოდენობით უაქციზო სიგარეტი ამოიღეს დანაშაულში მხილებული პირების საცხოვრებელი სახლებიდან და სატრანსპორტო საშუალებებიდან.
გავრცელებული ინფორმაციით, პოლიციამ ჯამში 4 110 კოლოფი უაქციზო სიგარეტი ამოიღო, რომლის საერთო საბაზრო ღირებულება 12 ათას ლარს აღემატება.
გამოძიება საქართველოს სისხლის სამართლის კოდექსის მე-200 მუხლის პირველი და მეორე ნაწილებით მიმდინარეობს, რაც სასჯელის სახით ითვალისწინებს თავისუფლების აღკვეთას 4-დან 6 წლამდე ვადით.