თბილისი, 4 იანვარი – Sputnik. წინასწარი შეთანხმებით ჯგუფის მიერ, დიდი ოდენობით ყალბი ფულის შენახვა-გასაღების ფაქტზე თურქეთის რესპუბლიკის ორი მოქალაქე დააკავეს, იუწყება საქართველოს ფინანსთა სამინისტროს საგამოძიებო სამსახური.
„გამოძიებით დადგინდა, რომ 2018 წლის დეკემბერში, დანაშაულში მხილებულმა პირებმა ქალაქ ბათუმში მდებარე სავალუტო ჯიხურებში 7 000 ევროს ოდენობის ყალბი 500-ევროიანი კუპიურები გაასაღეს“, – აღნიშნულია განცხადებაში.
ბრალდებულების დაკავებისას, დამატებით ამოღებულია 6 ათასი ევროს ოდენობის ყალბი ფული.
მომხდარ ფაქტზე გამოძიება მიმდინარეობს სსკ-ის 212-ე მუხლის მეორე ნაწილით, რაც გულისხმობს დიდი ოდენობით ყალბი ფულის ან ფასიანი ქაღალდის დამზადებას ან გასაღებას და 7-დან 10 წლამდე ვადით თავისუფლების აღკვეთას ითვალისწინებს.