თბილისი, 21 ნოემბერი — Sputnik. ცესკო-მ საქართველოს პრეზიდენტის მეორე ტურისთვის ბიულეტენების ბეჭდვა დაიწყო, ნათქვამია ცესკო-ს ვებგვერდზე გავრცელებულ განცხადებაში.
საპრეზიდენტო არჩევნების მეორე ტური 28 ნოემბერს გაიმართება. საქართველოს მოქალაქეებს არჩევანის გაკეთება მოუწევს „ქართული ოცნება - დემოკრატიული საქართველოს“ მიერ მხარდაჭერილ სალომე ზურაბიშვილსა და გრიგოლ ვაშაძეს შორის, რომელიც ოპოზიციური გაერთიანება „ძალა ერთობაშიას“ კანდიდატია.
ბიულეტენების ბეჭდვის პროცესი რამდენიმე დღე გაგრძელდება და მას ორი საერთაშორისო და 12 ადგილობრივი არასამთავრობო ორგანიზაციის წარმომადგენლები დააკვირდებიან.
„საერთო ჯამში თბილისის 6 სტამბაში 3 705 საარჩევნო უბნისთვის დაიბეჭდება 3 278 450 ბიულეტენი“, - ნათქვამია განცხადებაში.
აღსანიშნავია, რომ ბიულეტენები დაიბეჭდება ეთნიკური უმცირესობების ენებზეც. ქართულ-აზერბაიჯანულ ენებზე ბიულეტენები მიეწოდება 209 საარჩევნო უბანს, ხოლო ქართულ-სომხურ ენებზე - 133 საარჩევნო უბანს. ასევე 4 საარჩევნო უბნისთვის დაიბეჭდება სამენოვანი ბიულეტენები ქართულ-აზერბაიჯანულ-სომხურ ენებზე.
ცენტრალური საარჩევნო კომისია კანონით განსაზღვრულ ვადებში (არჩევნების დღემდე არაუგვიანეს მე-2 დღისა), ბიულეტენებს საოლქო საარჩევნო კომისიებს გადასცემს. თავის მხრივ, საოლქო საარჩევნო კომისიები კენჭისყრის დაწყებამდე არაუგვიანეს 12 საათისა უზრუნველყოფენ ბიულეტენების მიწოდებას საუბნო საარჩევნო კომისიებისათვის.
საქართველოში მეორე ტურისთვის ამომრჩეველთა ერთიან სიაში საერთო ჯამში რეგისტრირებულია 3 528 658 ამომრჩეველი.
არჩევნების პირველი ტურისთვის, რომელიც 28 ოქტომბერს გაიმართა, 3 252 800 ბიულეტენი დაიბეჭდა. დასწრებამ 46,74% შეადგინა.
