თბილისი, 18 ნოემბერი – Sputnik. ხელვაჩაურის მუნიციპალიტეტის სოფელ ახალსოფელში ავტოავარიის შედეგად ერთი ადამიანი ადგილზე გარდაიცვალა, ორი კი დაშავდა, იუწყება პირველი არხი.
ფეხით მოსიარულეებს ავტომანქანა დაეჯახა, რომელიც, ერთ-ერთი დაშავებული დავით მელაძის თქმით, გადაჭარბებული სიჩქარით მოძრაობდა. შემთხვევას მისი მეუღლე ემსხვერპლა. დავით მელაძის განცხადებით, მძღოლი ადგილიდან მიიმალა.
„სამი ვიყავით – მე, ჩემი მეუღლე და მეზობელი ქალი. სწრაფად მომავალო მანქანა დაგვეჯახა. რომ წამოვდექი, მეუღლესთან მივედი, უკვე გარდაცვლილი იყო“, – აცხადებს დავით მელაძე.
შემთხვევის ადგილზე ექსპერტ-კრიმინალისტები მუშაობენ.
როგორც „Sputnik-საქართველოს" შინაგან საქმეთა სამინისტროს პრეს–სამსახურში განუცხადეს, მომხდართან დაკავშირებით გამოძიება სისხლის სამართლის კოდექსის 276-ე მუხლის მეხუთე ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია.
