თბილისი, 29 ოქტომბერი – Sputnik. ზუგდიდის მუნიციპალიტეტის სოფელ ჭითაწყარში ერთ-ერთ საცხოვრებელ სახლში ხანძარი გაჩნდა, იუწყება „Sputnik-საქართველოს“ კორესპონდენტი.
თვითმხილველების განცხადებით, მიუხედავად იმისა, რომ ადგილზე სახანძრო-სამაშველო ბრიგადები დროულად მივიდნენ, ხის საცხოვრებელი სახლი, რომელშიც სამსულიანი ოჯახი ცხოვრობდა, მთლიანად დაიწვა.
როგორც მერის წარმომადგენელმა აღნიშნულ თემში „Sputnik-საქართველოს“ კორესპონდენტს განუცხადა, საბედნიეროდ, ხანძარს მსხვერპლი არ მოჰყოლია.
„ხანძარი, სავარაუდოდ, გაუმართავი ელექტროგაყვანილობიდან გაჩნდა. მერია დაზარალებულ ოჯახს შესაბამის დახმარებას გაუწევს“, - განაცხადა ბადრი დარასელიამ.
მომხდარ ფაქტთან დაკავშირებით მიმდინარეობს გამოძიება სსკ-ის 188-ე მუხლის პირველი ნაწილით („ნივთის დაზიანება ან განადგურება, რამაც მნიშვნელოვანი ზიანი გამოიწვია“).
