თბილისი, 28 აგვისტო – Sputnik. ანაკლიაში, ელექტრონული მუსიკის ფესტივალიდან კლინიკებში 27 ადამიანი გადაიყვანეს, იუწყება ტელეკომპანია Imedi.
ფესტივალზე მედპერსონალმა პირველადი დახმარება 253 პირს აღმოუჩინა. სასწრაფო სამედიცინო დახმარების ეკიპაჟმა78 გამოძახება შეასრულა, ამათგან 53 პირს ზოგადი ჩივილები აღენიშნებოდა.
25 შემთხვევაში სხვადასხვა სახის ინტოქსიკაცია დაფიქსირდა, რომელთაგან 11 პაციენტს დასჭირდა ჰოსპიტალიზაცია, საერთო ჯამში კლინიკაში 27 ადამიანი გადაიყვანეს.
ამ დროისთვის საავადმყოფოდან ყველა პაციენტი გაწერილია.
ფესტივალის გახსნიდან მის დასრულებამდე, ადგილზე იყო სასწრაფო დახმარების 5 ეკიპაჟი, სამედიცინო დახმარების 3 პუნქტი, 2 რეანომობილი და 5 ქვეითი პირველადი სამედიცინო დახმარების ჯგუფი.
25 აგვისტოს ანაკლიის ფესტივალის მონაწილე ახალგაზრდა მამაკაცი ზუგდიდის რეფერალურ საავადმყოფოში გარდაიცვალა. ექიმის ცნობით, გარდაცვლილ კაცს უცნობი სუბსტანციით ინტოქსიკაციის ნიშნები ჰქონდა.
