თბილისი, 20 აგვისტო — Sputnik. საბაჟო-გამშვებ პუნქტ „ყაზბეგი-ზემო ლარსზე“ სატვირთო ავტომობილების გატარებაზე შეზღუდვები ისევ მოქმედებს, იუწყება Новости-Грузия საქართველოს შემოსავლების სამსახურზე დაყრდნობით.
შემოსავლების სამსახურში აცხადებენ, რომ რუსულმა მხარემ შეზღუდვების დაწესება მოახდინა, რომელიც, ტურისტული სეზონის გამო, პირველ რიგში ტურისტების მანქანებს ატარებს, შემდეგ კი სატვირთოებს. ამის გამო, „ყაზბეგი-ზემო ლარსის“ მისადგომებთან ქართულ მხარეს ათობით სატვირთო ავტომობილი დაგროვდა.
უწყების პრესსამსახურის თანამშრომლის თქმით, რუსული მხარე დღეში საშუალოდ 180-დან 220 მანქანამდე ატარებს, იმისათვის, რომ საბაჟომ ნორმალურად იმუშაოს და რიგები არ გაჩნდეს, საჭიროა 400 ავტომობილის გატარება.
ვითარება საქართველო-რუსეთის საზღვარზე: „ყაზბეგი" შეუფერხებლად მუშაობს >>
„ყაზბეგი–ზემო ლარსი" ამჟამად საქართველოსა და რუსეთის სახმელეთო საზღვარზე ერთადერთი მოქმედი საკონტროლო-გამშვები პუნქტია. ის ძალზე მნიშვნელოვანია სომხეთისთვის, რომელსაც რუსეთთან საერთო საზღვარი არ აქვს.
