თბილისი, 18 აგვისტო — Sputnik. უახლოეს მომავალში კურორტი გუდაური კლიმატზე დამოკიდებული აღარ იქნება — იქ ხელოვნური გათოვლიანების უახლესი სისტემა ამუშავდება.
გუდაურის მეორე სათხილამურო ტრასაზე აღნიშნულ სისტემას 2019 წლის ზამთრის სეზონისთვის იტალიური კომპანია „ტექნოალპინი“ დაამონტაჟებს, ნათქვამია ეკონომიკისა და მდგრადი განვითარების სამინისტროს „მთის კურორტების განვითარების კომპანიის“ Facebook-გვერდზე.
კომპანიებს შორის შესაბამისი ხელშეკრულება იტალიაში გაფორმდა.
იტალიური კომპანია „ტექნოალპინი“ ხელოვნური გათოვლიანების სისტემებს 1990 წლიდან აწარმოებს და 50-ზე მეტ ქვეყანაში მას 1800-ზე მეტი კლიენტი ჰყავს.
ბოლო წლებში კომპანია უწევდა პარტნიორობას მრავალ ფართომასშტაბიან ღონისძიებას — ოლიმპიური თამაშებს, მსოფლიო ჩემპიონატებსა და მსოფლიო თასების ეტაპების სათხილამურო რბოლებს, აგრეთვე იყო სათხილამურო სპორტის საერთაშორისო ფედერაციის ოფიციალური პარტნიორი.
გუდაური საქართველოს ერთ-ერთი ყველაზე პოპულარული სამთო-სათხილამურო კურორტია, რომელმაც მსოფლიო აღიარება მოიპოვა. 2023 წელს აქ ფრისტაილსა და სნოუბორდინგში მსოფლიო ჩემპიონატი ჩატარდება.
ტურისტების ნაკადი საქართველოში იზრდება. ტურისტების რაოდენობა საქართველოს ოთხ სამთო-სათხილამურო კურორტზე (გუდაურში, ბაკურიანში, გოდერძიზე და სვანეთში) 2011 წლიდან ექვსჯერ გაიზარდა.
