თბილისი, 16 აგვისტო – Sputnik. სამედიცინო საქმიანობის სახელმწიფო რეგულირების სააგენტო ფარმაცევტული კომპანიებისგან 42 დასახელების მედიკამენტის რეალიზაციის შეწყვეტასა და ბაზრიდან მათი გამოთხოვის უზრუნველყოფას ითხოვს, ნათქვამია სააგენტოს ოფიციალურ გვერდზე გავრცელებულ ინფორმაციაში.
ამის მიზეზია სააგენტოში შესული შეტყობინება კომპანია „Zhejiang Huahai Pharmaceuticals“-ის მიერ წარმოებულ აქტიურ ფარმაცევტულ ინგრედიენტ „Valsartan“-ში დაფიქსირებული მინარევების შესახებ, რომელიც, მასმედიის ცნობით, ონკოლოგიური რისკის მატარებელია.
სააგენტო მიმართავს ფარმაცევტულ დაწესებულებებს, შეწყვიტონ მითითებული სამკურნალო საშუალებების რეალიზაცია და უზრუნველყონ მათი ბაზრიდან გამოთხოვა. განცხადებას თან ერთვის პრეპარატების ჩამონათვალი.
მასმედიის ინფორმაციით, პრეპარატები შეიცავს აქტიურ სუბსტანციას (ვალსარტანს), რომლის მწარმოებელი ერთ-ერთი ჩინური ფარმაცევტული კომპანიაა. როგორც ირკვევა, 11 დასახელების 42 სახეობის მედიკამენტის მოხმარება რისკებს შეიცავს.
„ჩინურმა კომპანიამ თავის წარმოებაში რაღაც შეცვალა ტექნოლოგიაში და გამოვლინდა, რომ იქ იყო მინარევი, რაც, შესაძლოა, იყოს ონკოლოგიური დაავადების გამომწვევი რისკ-ფაქტორი", — განმარტავს წამლის რეგულირების სააგენტოს ფარმაცევტული საქმიანობის დეპარტამენტის წარმომადგენელი, ნაილი შენგელიძე, იუწყება ტელეკომპანია Imedi.
