ვაზიანის სამხედრო აეროდრომზე რიგით მეოთხე მრავალეროვნული სამხედრო სწავლება „ღირსეული პარტნიორი 2018" (Noble Partner) ლოზუნგით „ძალა პარტნიორობაშია" დაიწყო
წვრთნებზე საქართველოში ჩამოვიდნენ სამხედროები 12 ქვეყნიდან, მათ შორის აშშ-დან, გერმანიიდან, თურქეთიდან, უკრაინიდან, აზერბაიჯანიდან და სომხეთიდან.
გახსნის ცერემონიაში მონაწილეობა მიიღო ქვეყნის უმაღლესმა ხელმძღვანელობამ: პრეზიდენტმა გიორგი მარგველაშვილმა, პრემიერ-მინისტრმა მამუკა ბახტაძემ, თავდაცვის მინისტრმა ლევან იზორიამ და გენერალური შტაბის მეთაურმა ვლადიმერ ჩაჩიბაიამ.
მრავალეროვნული სამხედრო სწავლება „ღირსეული პარტნიორი 2018"-ის მიზანია საქართველოს, აშშ-ის და პარტნიორ ქვეყნებს შორის მზადყოფნის და თავსებადობის ამაღლება. ასევე, სტაბილურობის, თავდაცვითი და შეტევით ოპერაციებში უნარ-ჩვევების გაუმჯობესება და შავი ზღვის აუზში უსაფრთხოების გარემოს შექმნაში წვლილის შეტანა.
წვრთნები „ღირსეული პარტნიორი" 15 აგვისტოს დასრულდება.